കോര്‍പ്പറേറ്റ് നികുതികളെ മറികടന്ന് വ്യക്തിഗത നികുതി

ഇന്ത്യയുടെ ചരിത്രത്തിലാദ്യമായി വ്യക്തിഗത ആദായ നികുതി പിരിവ് കോര്‍പ്പറേറ്റ് നികുതികളെ മറികടന്നു. പ്രത്യക്ഷ നികുതികളില്‍ വ്യക്തിഗത ആദായ നികുതിയുടെ വിഹിതം 2014 സാമ്പത്തിക വര്‍ഷത്തിലെ 38.1 ശതമാനത്തില്‍ നിന്ന് 2024 സാമ്പത്തിക വര്‍ഷത്തില്‍ 53.4 ശതമാനമായി കുത്തനെ ഉയര്‍ന്നു. അതേസമയം കോര്‍പ്പറേറ്റ് നികുതികള്‍ ഇതേ കാലയളവില്‍ 61.9 ശതമാനത്തില്‍ നിന്ന് 46.6 ശതമാനമായി കുറഞ്ഞു. 2014 സാമ്പത്തിക വര്‍ഷത്തില്‍ 2.5 ലക്ഷം കോടി രൂപയായിരുന്ന ടിഡിഎസ് നികുതി ശേഖരണം 2024 സാമ്പത്തിക വര്‍ഷത്തില്‍ ഇരട്ടിയിലധികമായി 6.5 ലക്ഷം കോടി രൂപയിലെത്തി. സമയപരിധിക്ക് മുമ്പുളള നികുതി പേയ്മെന്റുകള്‍ 2.9 ലക്ഷം കോടി രൂപയില്‍ നിന്ന് 12.8 ലക്ഷം കോടി രൂപയായും ഉയര്‍ന്നു. ടിഡിഎസും സമയപരിധിക്ക് മുമ്പുളള നികുതി പേയ്മെന്റും ഇപ്പോള്‍ മൊത്തം പ്രത്യക്ഷ നികുതിയുടെ പകുതിയിലധികമാണ്. സജീവ ജിഎസ്ടി നികുതിദായകരുടെ എണ്ണം 2019-ലെ 1.24 കോടിയില്‍ നിന്ന് 2024-ല്‍ 1.47 കോടിയായി ഉയര്‍ന്നു.