വിഷ്ണു വിശാല്‍ നായകനായി 2018ല്‍ സര്‍പ്രൈസ് ഹിറ്റായി മാറിയ തമിഴ് ചിത്രമായിരുന്നു ‘രാക്ഷസന്’. അന്ന് തമിഴ്‌നാടിന് പുറമെ കേരളത്തിലും സിനിമ വലിയ രീതിയില്‍ ശ്രദ്ധിക്കപ്പെട്ടു. സൈക്കോളജിക്കല്‍ ത്രില്ലറായി ഒരുങ്ങിയ സിനിമ രാംകുമാര്‍ ആണ് സംവിധാനം ചെയ്തത്. അമല പോള്‍ രാക്ഷസനില്‍ വിഷ്ണു വിശാലിന്റെ നായികയായി. അന്ന് ഏറ്റവും ചര്‍ച്ച ചെയ്യപ്പെട്ട ത്രില്ലര്‍ ചിത്രങ്ങളിലൊന്നായിരുന്നു ഇത്. രാക്ഷസനില്‍ ക്രിസ്റ്റഫര്‍ എന്ന സൈക്കോ വില്ലന്‍വേഷം ചെയ്ത ശരവണനും തന്റെ പ്രകടനം കൊണ്ട് കയ്യടി നേടി. രാക്ഷസന് രണ്ടാം ഭാഗം ഉണ്ടാകുമെന്ന് അറിയിച്ചിരിക്കുകയാണ് വിഷ്ണു വിശാല്‍ ഇപ്പോള്‍. ഹിറ്റ് ചിത്രത്തിന്റെ രണ്ടാം ഭാഗം അടുത്ത വര്‍ഷം ഉണ്ടാകുമെന്ന വിവരമാണ് പുറത്തുവന്നിരിക്കുന്നത്. വിഷ്ണു വിശാലിന്റെ കരിയറിലെ തന്നെ ഏറ്റവും വലിയ ഹിറ്റ് ആയിരുന്നു ഈ രാക്ഷസന്. ത്രില്ലര്‍ ചിത്രം നൂറ് ദിവസം തിയേറ്ററുകളില്‍ ഓടി. ബോക്സോഫിസില്‍ 30 കോടിയോളമാണ് രാക്ഷസന് നേടിയത്. സിനിമ പിന്നീട് തെലുങ്കിലേക്കും റീമേക്ക് ചെയ്തിരുന്നു. രാക്ഷസുഡു എന്ന പേരിലാണ് ചിത്രം തെലുങ്കില്‍ എത്തിയത്.