നവാഗതനായ സന്തോഷ് മോഹന്‍ പാലോട് സംവിധാനം ചെയ്യുന്ന ‘പൊലീസ് ഡേ’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ അണിയറക്കാര്‍ പുറത്തുവിട്ടു. ഒരു പൊലീസ് കഥയ്ക്ക് ഏറെ അനുയോജ്യമാംവിധത്തിലുള്ള പോസ്റ്ററാണ് ഫസ്റ്റ് ലുക്ക് ആയി പുറത്തുവിട്ടിരിക്കുന്നത്. പൊലീസ് യൂണിഫോമില്‍ നന്ദുവും ടിനി ടോമും ഇടത്തും വലത്തും ഒപ്പം നടുവിലായി അന്‍സിബയേയും പോസ്റ്ററില്‍ കാണാം. അതിന് താഴെയായി മൂന്ന് പൊലീസ് ഉദ്യോഗസ്ഥരും നടന്നു വരുന്നു. അതിലൊരാള്‍ വനിതയാണ്. ഒരു പൊലീസ് ഉദ്യോഗസ്ഥന്റെ മരണം കഥാപശ്ചാത്തലമാക്കുന്ന ചിത്രമാണിത്. ഈ കേസ് അന്വേഷിക്കാനെത്തുന്ന ഉന്നതനായ പൊലീസ് ഉദ്യോഗസ്ഥനാണ് ഡിവൈഎസ്പി ലാല്‍ മോഹന്‍. അദ്ദേഹത്തിന്റെ നേതൃത്വത്തിലുള്ള ഇന്‍വസ്റ്റിഗേഷനാണ് ഏറെ ത്രില്ലര്‍ മൂഡില്‍ ഈ ചിത്രത്തിലൂടെ അവതരിപ്പിക്കുന്നത്. ഒരു പൊലീസ് സ്റ്റോറിയുടെ എല്ലാ ഉദ്യേഗവും സസ്‌പെന്‍സും കോര്‍ത്തിണക്കിയ ഒരു ക്ലീന്‍ എന്റര്‍ടെയ്‌നറായിരിക്കും ചിത്രമെന്ന് അണിയറക്കാര്‍ പറയുന്നു. ടിനി ടോമാണ് ലാല്‍ മോഹന്‍ എന്ന ഇന്‍വസ്റ്റിഗേറ്റീവ് ഓഫീസറെ അവതരിപ്പിക്കുന്നത്. ഹരീഷ് കണാരന്‍, ധര്‍മ്മജന്‍ ബോല്‍ഗാട്ടി, ശ്രീധന്യ എന്നിവരും ഏതാനും പുതുമുഖങ്ങളും ഈ ചിത്രത്തില്‍ അണിനിരക്കുന്നു.