ദേവികുളം മുൻ എംഎൽഎ എസ് രാജേന്ദ്രനോട് വീട് ഒഴിയണമെന്ന് ആവശ്യപ്പെട്ട് വില്ലേജ് ഓഫീസർ നോട്ടീസ് നൽകി. മൂന്നാർ ഇക്കാ നഗറിലെ 7 സെൻറ് ഭൂമിയിലാണ് രാജേന്ദ്രൻ താമസിക്കുന്നത് . ഇത് പുറമ്പോക്കായതിനാൽ ഏഴ് ദിവസത്തിനകം ഒഴിഞ്ഞു പോകണമെന്നാണ് നോട്ടീസിൽ പറയുന്നത്. ദേവികുളം സബ് കളക്ടറുടെ നിർദ്ദേശ പ്രകാരം വില്ലേജ് ഓഫീസർ നോട്ടീസിൽ ഒഴിഞ്ഞു പോയില്ലെങ്കിൽ ബലമായി ഒഴിപ്പിക്കും എന്നു പറയുന്നുണ്ട് . ബലമായി ഒഴിപ്പിക്കേണ്ടി വന്നാൽ പോലീസ് സംരക്ഷണം ആവശ്യപ്പെട്ട് ദേവികുളം സബ് കളക്ടർ രാഹുൽ ആർ ശർമ ഇടുക്കി എസ്പിക്ക് കത്തും നൽകി.
എന്നാൽ ഈ വിഷയത്തിൽ മുൻ എം എൽ എ രാജേന്ദ്രൻ കോടതിയെ സമീപിച്ചു. തല്ക്കാലം വീട് ഒഴിയുന്നില്ല. 10 സെന്റിൽ താഴെയുള്ള ഭൂമിയിൽ താമസിക്കുന്നവരെ ഒഴിപ്പിക്കേണ്ട എന്ന് സംസഥാന സർക്കാർ തീരുമാനം നിലവിലുണ്ട് .ഈ പ്രദേശത്തുള്ള 30 പേർക്ക് കാരണം കാണിക്കൽ നോട്ടീസ് നൽകിയപ്പോൾ തനിക്ക് മാത്രമാണ് വീട് ഒഴിയാൻ ആവശ്യപ്പെട്ട് നോട്ടീസ് നൽകിയിരിക്കുന്നതെന്നും എസ് രാജേന്ദ്രൻ പറഞ്ഞു.