ഓരോ ദിവസം കഴിയുന്തോറും നിരവധി തരത്തിലുള്ള മാറ്റങ്ങള്‍ക്ക് വിധേയമാകുന്ന പ്ലാറ്റ്‌ഫോമാണ് എക്‌സ്. ഇത്തവണ രണ്ട് പുതിയ പ്രീമിയം സബ്‌സ്‌ക്രിപ്ഷന്‍ പ്ലാനുകളാണ് മസ്‌ക് അവതരിപ്പിക്കുന്നത്. ബേസിക്, പ്ലസ് എന്നിങ്ങനെ രണ്ട് കാറ്റഗറിയിലായാണ് പ്രീമിയം പ്ലാനുകള്‍ എത്തുന്നത്. ഇത് സംബന്ധിച്ച് ഔദ്യോഗിക പ്രഖ്യാപനം എക്‌സ് പ്ലാറ്റ്‌ഫോമിലൂടെ തന്നെയാണ് അറിയിച്ചത്. നിലവിലുള്ള പ്ലാനുകളെക്കാള്‍ താരതമ്യേന വരിസംഖ്യ കുറഞ്ഞ പ്ലാനാണ് ബേസിക്. എന്നാല്‍, ഉള്ളതില്‍ വച്ച് ഏറ്റവും വരിസംഖ്യ കൂടുതല്‍ പ്ലസ് പ്ലാനുകള്‍ക്കാണ്. പ്ലസ് പ്ലാനുകള്‍ തിരഞ്ഞെടുക്കുന്ന ഉപഭോക്താക്കള്‍ക്ക് നിരവധി അധിക ആനുകൂല്യങ്ങള്‍ ലഭിക്കും എന്നതാണ് പ്രത്യേകത. ഇവയില്‍ പരസ്യരഹിത സേവനമാണ് ഉണ്ടായിരിക്കുക. എന്നാല്‍, വരിസംഖ്യയെ കുറിച്ചുള്ള കൃത്യമായ വിവരങ്ങളോ, ഈ 2 പ്ലാനുകള്‍ എപ്പോള്‍ അവതരിപ്പിക്കുന്നത് സംബന്ധിച്ചോ ഉള്ള വിവരങ്ങള്‍ മസ്‌ക് പങ്കുവെച്ചിട്ടില്ല. ഇന്ത്യയില്‍ ഡെസ്‌ക്ടോപ്പ് ആപ്പ് ഉപയോഗിക്കുന്നതിനായി വാര്‍ഷിക പ്രീമിയം പ്ലാനുകള്‍ക്ക് 6,800 രൂപയും, പ്രതിമാസ പ്ലാനിന് 650 രൂപയുമാണ് നിരക്ക്. എന്നാല്‍, മൊബൈല്‍ ആപ്പ് ഉപയോഗിക്കുന്നവര്‍ വാര്‍ഷിക പ്രീമിയം സബ്‌സ്‌ക്രിപ്ഷന്‍ പ്ലാനായി 9,400 രൂപയാണ് അടയ്‌ക്കേണ്ടത്. പ്രതിമാസ നിരക്ക് 900 രൂപയാണ്.