സ്റ്റോറുകളില് നിന്ന് മോഷ്ടിക്കപ്പെട്ട ഫോണുകള് പ്രവര്ത്തനരഹിതമാക്കാന് കഴിയുന്ന ‘കില് സ്വിച്ച്’ ഏര്പ്പെടുത്തി യു.കെയിലെ രണ്ട് മൊബൈല് നെറ്റ്വര്ക്ക് പ്രൊവൈഡര്മാര്. വെര്ജിന് മീഡിയ ഒ2, വോഡാഫോണ് ത്രീ എന്നിവയാണ് പുതിയ സംവിധാനം അവതരിപ്പിച്ചത്. ആപ്പിള്, സാംസങ് തുടങ്ങിയ നിര്മ്മാതാക്കള് മോഷണം തടയുന്നതിനുള്ള ഇത്തരം നടപടികളില് നേരത്തെ എതിര്പ്പ് അറിയിച്ചിരുന്നു. എന്നാല് മോഷണം റിപ്പോര്ട്ട് ചെയ്യുന്ന നിമിഷം തന്നെ ഉപകരണങ്ങള് പ്രവര്ത്തനരഹിതമാക്കുന്ന സാങ്കേതികവിദ്യയാണ് രണ്ട് കമ്പനികള് അവതരിപ്പിച്ചിട്ടുള്ളത്. മോഷ്ടിക്കപ്പെട്ട ഫോണുകള് വിപണിയിലെത്തുന്നത് തടയാനുള്ള നീക്കത്തിന്റെ ഭാഗമായാണിത്. ലണ്ടനില് മാത്രം കഴിഞ്ഞ വര്ഷം 70,000-ല് അധികം ഫോണ് മോഷണങ്ങള് നടന്നുവെന്നാണ് റിപ്പോര്ട്ടുകള്. പുതിയ സാങ്കേതികവിദ്യ വില്ക്കാത്ത ഡിവൈസുകളില് മാത്രമേ സാധ്യമാകൂ. മൊബൈല് ഫോണ് സ്റ്റോറുകളില് സംഘടിതമായ കവര്ച്ച നടത്തുന്നത് തടയുകയാണ് ഇതിന്റെ ലക്ഷ്യം.
