ഇന്ത്യയില്‍ ഈയടുത്തിടെ ഫോക്‌സ്വാഗണ്‍ എത്തിച്ച ഗോള്‍ഫ് ജി ടി ഐയ്ക്ക് മറ്റേതൊരു വാഹനത്തിനു ലഭിക്കാത്തത്രയും സ്വീകാര്യതയാണ് ലഭിച്ചത്. ഇന്ത്യന്‍ ക്രിക്കറ്റിലെ ഏറ്റവും പ്രതിഭാധനനായ ബൗളര്‍ ജസ്പ്രീത് ബുമ്രയാണ് ഇനി ഗോള്‍ഫ് ജി ടി ഐ യുടെ ബ്രാന്‍ഡ് അംബാസിഡര്‍. ഫോക്‌സ്വാഗന്‍ ഗോള്‍ഫ് ജിടിഐ, എന്ന പോക്കറ്റ് റോക്കറ്റ് കമ്പനിയുടെ ഏറ്റവും ജനപ്രിയ കാറുകളിലൊന്നാണ്. ഗോള്‍ഫിന്റെ പെര്‍ഫോമന്‍സ് മോഡലാണ് ഗോള്‍ഫ് ജിടിഐ. എട്ടാം തലമുറയാണ് ഇപ്പോള്‍ ഇന്ത്യന്‍ വിപണിയില്‍ എത്തിയിരിക്കുന്നത്. ഫോക്‌സ്വാഗന്‍ ഇന്ത്യയുടെ ഏറ്റവും കരുത്തന്‍ മോഡലെന്ന ഖ്യാതിയും ഈ വാഹനത്തിനു സ്വന്തമാണ്. ഗോള്‍ഫ് ജിടിഐയില്‍ 2.0 ലീറ്റര്‍ ടര്‍ബോചാര്‍ജ്ഡ് പെട്രോള്‍ എന്‍ജിനാണ്. 265 പിഎസ് കരുത്തും പരമാവധി 370 എന്‍എം ടോര്‍ക്കും. 7 സ്പീഡ് ഡിഎസ്ജി ട്രാന്‍സ്മിഷനാണ് വാഹനത്തിന്. വേഗം 100 കിലോമീറ്റര്‍ കടക്കാന്‍ വെറും 5.9 സെക്കന്‍ഡ് മതി. പരമാവധി വേഗം മണിക്കൂറില്‍ 250 കിലോമീറ്റര്‍.