ഇഷ്ടഭക്ഷണം, കണ്ടാല്‍ തുള്ളിച്ചാടും

ഇന്ത്യന്‍ ഭക്ഷണം കഴിച്ചു ശീലിച്ചയാള്‍ യൂറോപ്പില്‍ പോയി ഉണക്ക ബ്രെഡും മുളകും പുളിയും മസാലയുമൊന്നുമില്ലാതെ പുഴുങ്ങിയ കറികളും കഴിച്ചു മടുത്ത് തീന്‍മേശയില്‍ പഴയ ഇഷ്ട വിഭവങ്ങള്‍ കണ്ടാല്‍ എങ്ങനെയായിരിക്കും. അങ്ങനെയൊരു അനുഭവം നിഷ്‌കളങ്കയായ ഒരു കുഞ്ഞിനാണുണ്ടാകുന്നതെങ്കിലോ. ഈ വീഡിയോ ഒന്നു കണ്ടു നോക്കൂ. ഇന്ത്യയില്‍നിന്ന് യുഎസ്എയിലേക്ക് ദത്തെടുത്തു കൊണ്ടുപോയ ബധിരയായ പെണ്‍കുട്ടിക്കു ഹോട്ടലിലെ തീന്‍മേശയിലേക്കു തന്റെ ഇഷ്ടപ്പെട്ട നാടന്‍ ഭക്ഷണം കൊണ്ടുവരികയാണ്. അപ്പോള്‍ ആ കുട്ടി പ്രകടിപ്പിച്ച ആഹ്ലാദഭാവങ്ങളുടെ വീഡിയോ സാമൂഹിക മാധ്യമങ്ങളിലൂടെ ജനലക്ഷങ്ങളുടെ ഹൃദയം കവര്‍ന്നു. തന്റെ സന്തോഷം പ്രകടമാക്കാന്‍ ബധിരയും മൂകയുമായ അവള്‍ക്കു ശബ്ദമില്ല. ഭക്ഷണം കൊണ്ടുവരുന്നയാളോടു വേഗം കൊണ്ടുവരൂവെന്ന് കൈകൊണ്ട് ആംഗ്യം കാണിക്കുകയും തുള്ളിച്ചാടുകയും ചെയ്യുന്നു. ചോറും കറികളും അടക്കമുള്ള താലി എന്നറിയപ്പെടുന്ന ഇഷ്ടപ്പെട്ട ഭക്ഷണ വിഭവങ്ങള്‍. അതു കണ്ട് ആ കുഞ്ഞിന്റെ മുഖത്തു മിന്നിമറയുന്ന ആഹ്ലാദ ഭാവങ്ങളും തുള്ളിച്ചാട്ടവുമെല്ലാം കാണേണ്ടതുതന്നെയാണ്. യുണിലാഡ് എന്ന ഇന്‍സ്റ്റാഗ്രാം അക്കൗണ്ടിലൂടെയാണ് ഈ വീഡിയോ പങ്കുവയ്ക്കപ്പെട്ടത്. ഒപ്പം ഇങ്ങനെയൊരു കുറിപ്പുമുണ്ട്: ‘ഇന്ത്യയില്‍നിന്നു ദത്തെടുത്ത അവളുടെ ഇഷ്ടപ്പെട്ട ദേശീയ ഭക്ഷണം കണ്ട് അടങ്ങിയിരിക്കാന്‍ കഴിയുന്നില്ല.’ ViralHog എന്ന വീഡിയോ ലൈസന്‍സിംഗ് കമ്പനിയാണ് ഈ വീഡിയോ സാമൂഹിക മാധ്യമങ്ങളില്‍ ആദ്യം പങ്കുവച്ചത്. പ്രിയപ്പെട്ട ഭക്ഷണം കാണുന്നതുതന്നെ ആഹ്ലാദകരമാണ്.