കിരണ്‍ അബ്ബാവരം നായകനായെത്തുന്ന പിരീഡ് ത്രില്ലര്‍ ‘ക’ എന്ന ചിത്രത്തിന്റെ തെലുങ്ക് തിയറ്റര്‍ അവകാശം നിര്‍മ്മാതാവ് വംശി നന്ദിപതി വമ്പന്‍ തുകക്ക് സ്വന്തമാക്കിയപ്പോള്‍ മലയാളം പതിപ്പ് ദുല്‍ഖര്‍ സല്‍മാന്റെ വേഫറര്‍ ഫിലിംസാണ് ലോകമെമ്പാടുമുള്ള തിയറ്ററുകളില്‍ എത്തിക്കുന്നത്. സുജിത്ത്, സന്ദീപ് എന്നിവര്‍ ചേര്‍ന്ന് തിരക്കഥയും സംവിധാനവും നിര്‍വഹിക്കുന്ന ചിത്രമാണിത്. നയന്‍ സരിക, തന്‍വി റാം എന്നിവര്‍ നായികമാരായെത്തുന്ന ഈ ചിത്രത്തിലൂടെ ഒരു ഗംഭീര തിരിച്ചുവരവിനായുള്ള തയ്യാറെടുപ്പിലാണ് കിരണ്‍ അബ്ബാവരം. നേരത്തെ പുറത്തുവിട്ട ചിത്രത്തിന്റെ ടീസറും ‘വേള്‍ഡ് ഓഫ് വാസുദേവ്’ എന്ന ഗാനത്തിന്റെ ലിറിക്കല്‍ വീഡിയോയും പ്രേക്ഷകരെ ആവേശത്തിലാഴ്ത്തിയിട്ടുണ്ട്. തമിഴ്, മലയാളം, കന്നഡ, തെലുങ്ക് ഭാഷകളിലായ് പ്രദര്‍ശനത്തിനെത്തുന്ന ചിത്രം പക്കാ ആക്ഷന്‍ പാക്ക്ഡ് ത്രില്ലറായാണ് ഒരുങ്ങുന്നത്. ചിത്രീകരണം പൂര്‍ത്തിയായ ചിത്രമിപ്പോള്‍ പോസ്റ്റ് പ്രൊഡക്ഷന്‍ സ്റ്റേജിലാണ്.