ഡി ഏയ്ജിങ് സാങ്കേതിക വിദ്യ ‘ഇന്ത്യന്‍ 2’ വില്‍ പരീക്ഷിക്കാന്‍ ശങ്കര്‍. സൂപ്പര്‍താരങ്ങളെ അവരുടെ മുപ്പതുകളിലേക്കും ഇരുപതുകളിലേക്കും എത്തിക്കാന്‍ കഴിയുന്ന സാങ്കേതിക വിദ്യയാണ് ഡി ഏയ്ജിങ്. പ്രേക്ഷകരുടെ ഇഷ്ട താരങ്ങളെ അവരുടെ ചെറുപ്പകാലത്തെ ലുക്കിലെ അതേ ഗെറ്റപ്പില്‍ മാറ്റിയെടുക്കാന്‍ ഈ സാങ്കേതിക വിദ്യയ്ക്കാകും. കമല്‍ഹാസന്‍ അവതരിപ്പിക്കുന്ന സേനാപതി എന്ന കഥാപാത്രത്തിന്റെ ചെറുപ്പകാലം ചിത്രീകരിക്കുന്നതിനാണ് ശങ്കര്‍ ഡി ഏയ്ജിങ് ഉപയോഗിക്കുന്നത്. ഇതാദ്യമായല്ല തമിഴില്‍ ഡി ഏയ്ജിങ് സാങ്കേതിക വിദ്യ ഉപയോഗിക്കുന്നത്. വിക്രം സിനിമയില്‍ ലോകേഷ് കനകരാജ് ഈ വിദ്യ ഉപയോഗിച്ചിരുന്നു. എന്നാല്‍ സമയത്തിന്റെയും അതിനു വരുന്ന ചിലവും കണക്കാക്കി അത് സിനിമയില്‍ നിന്നും ഒഴിവാക്കുകയായിരുന്നു. സിനിമയ്ക്കു വേണ്ടി ഉപയോഗിച്ച കമല്‍ഹാസന്റെ ഡി ഏയ്ജിങ് രംഗങ്ങള്‍ പിന്നീട് പുറത്തുവിടുമെന്നും ലോകേഷ് ഒരഭിമുഖത്തില്‍ വെളിപ്പെടുത്തിയിരുന്നു. എം.എസ്. ധോണി: ദ് അണ്‍ടോള്‍ഡ് സ്റ്റോറിയില്‍ സുശാന്ത് സിങ് രജ്പുത്തിന്റെ കുട്ടിക്കാലം കാണിക്കുന്നത് ഡി ഏയ്ജ് സാങ്കേതിക വിദ്യ വഴിയാണ്. ഷാറുഖ് ഖാന്റെ ഫാന്‍, ആമിര്‍ ഖാന്റെ ലാല്‍ സിങ് ഛദ്ദ എന്നീ സിനിമകളിലും ഇതേ സാങ്കേതിക വിദ്യ ഉപയോഗിച്ചിട്ടുണ്ട്.