‘കങ്കുവ’യ്ക്കൊപ്പം സര്‍പ്രൈസ് ആയി എത്തി മോഹന്‍ലാലിന്റെ ‘ബറോസ്’ ചിത്രത്തിന്റ ട്രെയ്ലര്‍. കങ്കുവ സിനിമയുടെ ഇടവേളയ്ക്കിടെയാണ് ബറോസിന്റെ ത്രീഡി ട്രെയ്ലര്‍ പ്രദര്‍ശിപ്പിച്ചത്. ദൃശ്യങ്ങളും വിഎഫ്എക്സും പ്രതീക്ഷ നല്‍കുന്നതാണ് എന്നുള്ള പ്രതികരണങ്ങളും ലഭിക്കുന്നുണ്ട്. ഇന്ത്യയിലെ ആദ്യ ത്രീഡി ചിത്രമായ ‘മൈ ഡിയര്‍ കുട്ടിച്ചാത്തന്‍’ സംവിധാനം ചെയ്ത ജിജോ പുന്നൂസിന്റെ കഥയെ ആസ്പദമാക്കിയാണ് മോഹന്‍ലാല്‍ ബറോസ് ഒരുക്കുന്നത്. ഗുരു സോമസുന്ദരം, മോഹന്‍ ശര്‍മ, തുഹിന്‍ മേനോന്‍ എന്നിവര്‍ക്കൊപ്പം വിദേശ താരങ്ങളായ മായാ, സീസര്‍, ലോറന്റെ തുടങ്ങിയവരും ബറോസില്‍ അഭിനയിച്ചിട്ടുണ്ട്. അഞ്ച് വര്‍ഷത്തെ കാത്തിരിപ്പിനൊടുവിലാണ് ബറോസ് റിലീസിനൊരുങ്ങുന്നത്. മാര്‍ക്ക് കിലിയനാണ് പശ്ചാത്തല സംഗീതം നിര്‍വ്വഹിക്കുന്നത്. മോഹന്‍ലാല്‍ തന്നെയാണ് സിനിമയിലെ പ്രധാന കഥാപാത്രമായ ബറോസിനെ അവതരിപ്പിക്കുന്നത്. ജിജോ പുന്നൂസിന്റെ തിരക്കഥയില്‍ ഒരുങ്ങുന്ന ചിത്രം 100 കോടി ബജറ്റിലാണ് ഒരുങ്ങുന്നതെന്നാണ് വിവരം.