പോര്‍ഷെ 911 കരേര എസ് സ്‌പോര്‍ട്‌സ് കാറിന് പിന്നാലെ ബിഎംഡബ്ല്യുവിന്റെ 2 സീറ്റ് കണ്‍വേര്‍ട്ടബിള്‍ സി4 സ്വന്തമാക്കി മംമ്ത മോഹന്‍ദാസ്. മലയാള സിനിമാ നടികളില്‍ വാഹനപ്രേമമുള്ള ചുരുക്കം ചില ആളുകളില്‍ ഒരാളാണ് നടി മംമ്ത മോഹന്‍ദാസ്. ബൈക്കുകളും കാറുകളുമെല്ലാം ഇഷ്ടപ്പെടുന്ന താരം തന്റെ വാഹനപ്രേമത്തേപ്പറ്റി പല അഭിമുഖങ്ങളിലും തുറന്നു പറഞ്ഞിട്ടുണ്ട്. കൊച്ചിയിലെ ബിഎംഡബ്ല്യു വിതരണക്കാരായ ഇവിഎം ഓട്ടോക്രാഫ്റ്റില്‍ നിന്നാണ് തണ്ടര്‍ലൈറ്റ് മെറ്റാലിക് നിറത്തിലുള്ള സി4 എം40ഐ മംമ്ത സ്വന്തമാക്കിയത്. ബിഎംഡബ്ല്യുവിന്റെ എന്‍ട്രി ലെവല്‍ സ്‌പോര്‍ട്‌സ് കാര്‍ എന്ന വിശേഷണമുള്ള സി4ന്റെ ഏറ്റവും പുതിയ മോഡലാണിത്. 90.90 ലക്ഷം രൂപയാണ് വാഹനത്തിന്റെ എക്‌സ്‌ഷോറൂം വില. കസ്റ്റമൈസേഷന് അനുസരിച്ച് വില കൂടും. പെട്രോള്‍ എന്‍ജിനോടെ മാത്രമാണ് വാഹനം ലഭിക്കുക. 3 ലീറ്റര്‍ എന്‍ജിന് 340 ബിഎച്ച്പി കരുത്തുണ്ട്. 500 എന്‍എം ആണ് ടോര്‍ക്ക്. വേഗം നൂറ് കടക്കാന്‍ വെറും 4.5 സെക്കന്‍ഡ് മതി ഈ കരുത്തന്‍ കാറിന്.
