4,000 വര്‍ഷം പഴക്കമുള്ള ഒരു കപ്പലിന്റെ അവശിഷ്ടങ്ങള്‍ ഇറ്റലിയില്‍ കണ്ടെത്തി. കപ്പലില്‍നിന്ന് എട്ടു കിലോ ഭാരമുള്ള പര്‍പ്പിള്‍ – ബ്ലാക് അഗ്നിപര്‍വ്വത ഗ്ലാസ് ആയ ഒബ്സിഡിയന്‍ സ്വര്‍ണ്ണം കണ്ടെടുത്തു. കട്ടിംഗ് ഉപകരണങ്ങള്‍ നിര്‍മ്മിക്കാന്‍ വളരെക്കാലമായി ഉപയോഗിക്കുന്ന അതിശയകരവും അതുല്യവുമായ കല്ലാണ് ഒബ്സിഡിയന്‍. അഗ്‌നിപര്‍വത ലാവ വളരെ വേഗത്തില്‍ മരവിപ്പിച്ചാണ് ഒബ്സിഡിയന്‍ രൂപപ്പെടുത്തുന്നത്. ശിലായുഗത്തിലെ കറുത്ത സ്വര്‍ണമെന്നും ഇത് അറിയപ്പെടുന്നു. ഇറ്റലിയിലെ കാപ്രിയിലെ ഗ്രോട്ടോയിലെ ബിയാങ്ക കടല്‍ ഗുഹയ്ക്ക് സമീപം സമുദ്രനിരപ്പില്‍ നിന്ന് 130 അടി താഴെയാണ് നേപ്പിള്‍സ് പോലീസിന്റെ അണ്ടര്‍വാട്ടര്‍ യൂണിറ്റ് കപ്പല്‍ കണ്ടെത്തിയത്. കണ്ടെത്തിയ ഒബ്സിഡിയന്‍ ഇറ്റലിയിലെ പുരാവസ്തു വകുപ്പ് ഏറ്റെടുത്തു.