രാജ്യത്തെ ഏറ്റവും വലിയ ഇലക്ട്രിക് ഇരുചക്ര വാഹന കമ്പനിയായി ഒല ഇലക്ട്രിക് വീണ്ടും ഉയര്‍ന്നു. കഴിഞ്ഞ മാസം അതായത് 2023 നവംബറില്‍ കമ്പനി 30,000 യൂണിറ്റുകള്‍ വിറ്റു. വാഹന്‍ കണക്കുകള്‍ പ്രകാരം ഒലയുടെ 30,000 ഇലക്ട്രിക് സ്‌കൂട്ടറുകള്‍ കഴിഞ്ഞ മാസം രജിസ്റ്റര്‍ ചെയ്തു. ഇതുവഴി ഒലയ്ക്ക് പ്രതിമാസ അടിസ്ഥാനത്തില്‍ 30 ശതമാനം വളര്‍ച്ച ലഭിച്ചു. ഉത്സവ സീസണായതിനാല്‍ കഴിഞ്ഞ മാസം മികച്ച പ്രതികരണമാണ് കമ്പനിക്ക് ലഭിച്ചത്. കിഴിഞ്ഞ മാസം പ്രതിദിനം 1000 പേര്‍ വീതം ഒല സ്‌കൂട്ടറുകള്‍ വാങ്ങി എന്നാണ് റിപ്പോര്‍ട്ടുകള്‍. ഒല ഇലക്ട്രിക്കിന്റെ വില്‍പ്പനയെക്കുറിച്ച് പറയുമ്പോള്‍, കഴിഞ്ഞ വര്‍ഷം ഇതേ കാലയളവിനെ അപേക്ഷിച്ച് 82 ശതമാനം ശക്തമായ വളര്‍ച്ചയാണ് കമ്പനി നേടിയത്. നവംബറില്‍ കമ്പനിക്ക് 35 ശതമാനം വിപണി വിഹിതവും ലഭിച്ചു. ബെംഗളൂരു ആസ്ഥാനമായുള്ള ഇവി നിര്‍മ്മാതാക്കളായ ഒല ഇലക്ട്രിക്ക് 2021 ഓഗസ്റ്റ് 15-ന് ഒല എസ്1 ലോഞ്ച് ചെയ്തുകൊണ്ട് യാത്ര ആരംഭിച്ചു. വിജയകരമായ രണ്ട് വര്‍ഷത്തിനുള്ളില്‍, ഒല ഇലക്ട്രിക് സ്‌കൂട്ടര്‍ നിരവധി സോഫ്റ്റ്വെയര്‍ അപ്ഡേറ്റുകള്‍ക്കും ഫീച്ചര്‍ മെച്ചപ്പെടുത്തലുകള്‍ക്കും പുതിയ വേരിയന്റുകളുടെ അവതരണത്തിനും സാക്ഷ്യം വഹിച്ചു.