മലയാളികളുടെ പ്രിയപ്പെട്ട യുവനടിയാണ് ഐശ്വര്യ ലക്ഷ്മി. ‘ഞണ്ടുകളുടെ നാട്ടില്‍ ഒരിടവേള’ എന്ന ചിത്രത്തിലൂടെ എത്തിയ ഐശ്വര്യയുടെ കരിയര്‍ ഗ്രാഫ് ഉയര്‍ത്തിയത് ‘മായാനദി’യിലെ അപര്‍ണ രവി(അപ്പു) എന്ന കഥാപാത്രമാണ്. ഇപ്പോള്‍ മലയാളവും കടന്ന് തമിഴിലും തെലുങ്കിലുമെല്ലാം സജീവമായിരിക്കുകയാണ് ഐശ്വര്യ. അടുത്തിടെ പുറത്തിറങ്ങിയ മണിരത്നത്തിന്റെ പൊന്നിയിന്‍ സെല്‍വന്‍ എന്ന ബ്രഹ്മാണ്ഡ ചിത്രത്തില്‍ പൂങ്കുഴലി എന്ന കഥാപാത്രമായി ഐശ്വര്യ എത്തിയിരുന്നു. ഇതോടെ തമിഴ്നാട്ടിലും ഐശ്വര്യ ശ്രദ്ധേയയായി. ഇപ്പോള്‍ ഇതാ വിഷ്ണു വിശാല്‍ നായകനാകുന്ന ‘ഗാട്ട ഗുസ്തി’യില്‍ നായകിയായി മാറിയിരിക്കുകയാണ് ഐശ്വര്യ. ചിത്രത്തിന്റെ ട്രെയ്ലര്‍ പുറത്തിറങ്ങി. ഐശ്വര്യയുടെ കരിയറിലെ വളരെ വ്യത്യസ്തമായ കഥാപാത്രമാണ് ഗാട്ട ഗുസ്തിയിലേത് എന്ന് വ്യക്തമാക്കുന്ന രംഗങ്ങളാണ് ട്രെയ്ലറില്‍ ഉള്‍പ്പെടുത്തിയിരിക്കുന്നത്. സ്പോര്‍ട്സ് ഡ്രാമ വിഭാഗത്തില്‍പ്പെടുന്ന ചിത്രത്തിന്റെ രചനയും സംവിധാനവും നിര്‍വഹിക്കുന്നത് ചെല്ല അയ്യാവുവാണ്. ആര്‍ ടി ടീം വര്‍ക്സ്, വി വി സ്റ്റുഡിയോസ് എന്നീ ബാനറുകളില്‍ രവി തേജ, വിഷ്ണു വിശാല്‍, ശുഭ്ര, ആര്യന്‍ രമേശ് എന്നിവരാണ് ചിത്രത്തിന്റെ നിര്‍മ്മാണം. ഡിസംബര്‍ 2 ന് തമിഴിനൊപ്പം തെലുങ്കിലുമായി തിയറ്ററുകളില്‍ എത്തും.