നന്നായി ഉറങ്ങാന്‍ സഹായിക്കുന്ന ഭക്ഷണങ്ങള്‍

ആരോഗ്യമായിരിക്കാന്‍ അത്യാവശ്യം വേണ്ട ഒന്നാണ് ശരിയായ ഉറക്കം. വിവിധ രോഗങ്ങളുടെ ആവിര്‍ഭാവം കുറയ്ക്കാനും പ്രതിരോധശേഷി ശക്തിപ്പെടുത്താനും ഉറക്കം സഹായിക്കുന്നു. ദിവസവും 7 മുതല്‍ 9 മണിക്കൂര്‍ വരെ ഉറങ്ങാന്‍ ഡോക്ടര്‍മാര്‍ നിര്‍ദ്ദേശിക്കുന്നുണ്ട്. ഉറങ്ങുമ്പോള്‍ നിങ്ങളുടെ ആരോഗ്യത്തിന് പ്രധാനപ്പെട്ട നിരവധി ശാരീരിക പ്രവര്‍ത്തനങ്ങള്‍ ശരീരത്തില്‍ നടക്കുന്നു. പുരുഷന്മാരെ അപേക്ഷിച്ച് സ്ത്രീകള്‍ക്ക് കൂടുതല്‍ സമയം ഉറങ്ങേണ്ടതും അത്യാവശ്യമാണ്. അതേസമയം, രാത്രി വൈകിയുള്ള അത്താഴം, കൂടിയ അളവിലുള്ള ഭക്ഷണം, സമ്മര്‍ദ്ദം, ഉത്കണ്ഠ എന്നിവയും മറ്റ് പല ഘടകങ്ങളും ഉറക്കത്തിന് തടസ്സം സൃഷ്ടിച്ചേക്കാമെന്നാണ് ആരോഗ്യവിദഗ്ദ്ധരുടെ അഭിപ്രായം. ഒരു വ്യക്തിയെ നന്നായി ഉറങ്ങാന്‍ സഹായിക്കുന്ന 4 ഭക്ഷണങ്ങള്‍ നോക്കാം. ദഹനം മെച്ചപ്പെടുത്താനും നന്നായി ഉറങ്ങാനും അത്താഴത്തിന് ശേഷം ഡ്രൈ ഫ്രൂട്ട്‌സ് കഴിക്കണം. കശുവണ്ടി, ബദാം, വാല്‍നട്ട് എന്നിവ നിങ്ങളെ ഉറങ്ങാന്‍ സഹായിക്കുന്ന സായാഹ്ന ലഘുഭക്ഷണങ്ങളാണ്. ഉറങ്ങാന്‍ ബുദ്ധിമുട്ടുള്ളവര്‍ക്ക് ശുപാര്‍ശ ചെയ്യുന്ന ഒന്നാണ് ചമോമൈല്‍ ടീ. ഇത് സമ്മര്‍ദ്ദം ഒഴിവാക്കാനും നല്ല ഉറക്കം നല്‍കാനും സഹായിക്കുന്നു. ചെറുചൂടുള്ള ഒരു ഗ്ലാസ് പാലില്‍ അമിനോ ആസിഡുകള്‍ അടങ്ങിയിരിക്കുന്നു. ഇത് ഉറക്കവും മാനസികാവസ്ഥയും മെച്ചപ്പെടുത്തുന്നു, പ്രത്യേകിച്ച് പ്രായമായവരില്‍. ചെറുചൂടുള്ള പാലിലെ ട്രിപ്റ്റോഫാന്‍ എന്ന അമിനോ ആസിഡാണ് സെറോടോണിന്‍, മെലറ്റോണിന്‍ എന്നിവയുടെ ഉല്‍പാദനത്തില്‍ പ്രധാന പങ്ക് വഹിക്കുന്നത്. ഇഞ്ചിയും തുളസിയും വെള്ളത്തിലിട്ട് തിളപ്പിച്ച മിശ്രിതം കുടിക്കുന്നത് ഉറക്കക്കുറവിന് നല്ലതാണ്. ദഹനത്തിനും തടസ്സമില്ലാത്ത ഉറക്കത്തിനും ഈ പാനീയവും ശുപാര്‍ശ ചെയ്യുന്നു.