ഇട്ടേച്ചു പോയോ ?
ചിന്തിച്ചു തലപുകച്ച് കാറിനടുത്തേക്കു നടക്കുന്ന യുവാവ്. തൊട്ടു പിറകില്‍ കുഞ്ഞിനെ ചുമലില്‍ അടക്കിപ്പിടിച്ച് ഒരു യുവതി. യുവാവ് ഡ്രൈവിംഗ് സീറ്റിന്റെ ഡോര്‍ തുറന്ന് അകത്തു കയറുന്നു. പിറകിലുണ്ടായിരുന്ന യുവതി ആദ്യം ഡ്രൈവര്‍ സീറ്റിന്റെ വശത്തെ പിറകിലെ ഡോര്‍ തുറന്നെങ്കിലും അവിടെ കയറാതെ ആ ഡോര്‍ അടച്ച് കാറിന്റെ പിറകിലൂടെ മറുവശത്തെത്തി മുന്‍ സീറ്റില്‍ കയറാന്‍ നടന്നു. കാറിന്റെ മുന്‍വശത്തെ ഡോര്‍ തുറക്കാന്‍ ശ്രമിക്കുമ്പോഴേക്കും കാര്‍ മുന്നോട്ട് നീങ്ങി എന്നു മാത്രമല്ല, റോഡിലൂടെ ഓടിച്ച് പോയി. ആദ്യം ഒന്നു പകച്ച യുവതി ഒരു നിമിഷം അവിടെ നിന്നു. പിന്നെ കാര്‍ പോയ ഭാഗത്തേക്ക് നോക്കി ഫോണെടുത്ത് വിളിക്കുന്നതോടെ വീഡിയോ അവസാനിക്കുന്നു. എക്സ് പ്ളാറ്റ്ഫോമില്‍ ഫിഗന്‍ എന്ന അക്കൗണ്ടിലൂടെ പോസ്റ്റു ചെയ്ത വീഡിയോയാണിത്. ‘ദി ഹസ്ബന്‍ഡ് ഓഫ് ദ ഇയര്‍!’ എന്ന കുറിപ്പോടെയുള്ള ഈ വീഡിയോ കണ്ടത് ലക്ഷക്കണക്കിനല്ല, കോടിക്കണക്കിന് ആളുകളാണ്. രസകരമായ അനേകം കമന്റുകളും ഈ വീഡിയോക്കു ലഭിച്ചിട്ടുണ്ട്.
