ഇന്ത്യന്‍ സിനിമയൊന്നാകെ കാത്തിരിക്കുന്ന ചിത്രമാണ് ‘രാമായണ’. നിതേഷ് തിവാരി സംവിധാനം ചെയ്യുന്ന രണ്ട് ഭാഗങ്ങളിലായി എത്തുന്ന രാമായണയുടെ ആദ്യഭാഗം 2026 ദീപാവലിക്കും രണ്ടാം ഭാഗം 2027 ദീപാവലിക്കും തിയറ്ററുകളില്‍ എത്തും. റിലീസ് വിവരം പങ്കുവച്ചു കൊണ്ടുള്ള പുതിയ പോസ്റ്ററും അണിയറ പ്രവര്‍ത്തകര്‍ പുറത്തുവിട്ടിട്ടുണ്ട്. രാമായണയില്‍ സായ് പല്ലവി സീതയായി എത്തുമ്പോള്‍ രാമനായി അഭിനയിക്കുന്നത് രണ്‍ബീര്‍ കപൂര്‍ ആണ്. രാവണനായി എത്തുന്നത് തെന്നിന്ത്യന്‍ സൂപ്പര്‍ താരം യാഷും. അടുത്തിടെ ആണ് രാവണനായി താന്‍ എത്തുന്ന കാര്യം യാഷ് സ്ഥിരീകരിച്ചത്. ഒരു നടനെന്ന നിലയില്‍ അഭിനയിക്കാന്‍ ഏറ്റവും ആവേശകരമായ കഥാപാത്രമാണ് രാവണനെന്നും ആ വേഷമാകാന്‍ ആവേശത്തോടെ കാത്തിരിക്കുന്നുവെന്നും ആയിരുന്നു യാഷ് മുന്‍പ് പറഞ്ഞത്. സണ്ണി ഡിയോള്‍ ആണ് ചിത്രത്തില്‍ ‘ഹനുമാനെ’ അവതരിപ്പിക്കുന്നത്. 700 കോടിയാണ് രാമായണയുടെ ബജറ്റ് എന്നാണ് റിപ്പോര്‍ട്ടുകള്‍. വിഭീഷണന്റെ വേഷം ചെയ്യാന്‍ നിര്‍മ്മാതാക്കള്‍ വിജയ് സേതുപതിയുമായി ചര്‍ച്ച നടത്തിയെന്ന് നേരത്തെ റിപ്പോര്‍ട്ടുണ്ടായിരുന്നു.
