◾എല്‍ഡിഎഫ് സര്‍ക്കാരിന്റെ കെ റെയില്‍ പദ്ധതിക്ക് അംഗീകാരം കിട്ടാന്‍ ബിജെപി ഭരിക്കുന്ന കര്‍ണാടക സര്‍ക്കാരിനെ കൂട്ടുപിടിച്ച് മുഖ്യമന്ത്രി പിണറായി വിജയന്‍. സില്‍വര്‍ലൈന്‍ മംഗലാപുരംവരെ നീട്ടുന്നതിനു കേരള- കര്‍ണാടക സര്‍ക്കാരുകള്‍ തമ്മില്‍ ചര്‍ച്ച നടത്തും. മുഖ്യമന്ത്രി പിണറായി വിജയനും കര്‍ണാടക മുഖ്യമന്ത്രി ബസവരാജ് ബൊമ്മെയും തമ്മില്‍ ഈ മാസം തന്നെ ചര്‍ച്ച ഉണ്ടാകും. സില്‍വര്‍ ലൈന്‍ മംഗലാപുരംവരെ നീട്ടി അംഗീകാരം തരണമെന്ന് തിരുവനന്തപുരത്ത് നടക്കുന്ന സതേണ്‍ സോണല്‍ കൗണ്‍സില്‍ യോഗത്തില്‍ കേരളം ആവശ്യപ്പെട്ടിരുന്നു. ഇതേത്തുടര്‍ന്നാണ് ആദ്യം ഇരു സംസ്ഥാനങ്ങളും തമ്മില്‍ ചര്‍ച്ച നടത്താന്‍ ധാരണയായത്.
◾കേരളത്തിലും താമര വിരിയുമെന്ന് കേന്ദ്ര ആഭ്യന്തരമന്ത്രി അമിത് ഷാ. തിരുവന്തപുരത്ത് പട്ടികജാതി മോര്‍ച്ചയുടെ പട്ടികജാതി സംഗമത്തില്‍ സംസാരിക്കുകയായിരുന്നു അദ്ദേഹം. കേരളത്തില്‍ ബിജെപിക്കായി പ്രവര്‍ത്തിക്കണമെങ്കില്‍ രാഷ്ട്രഭക്തിക്കൊപ്പം ബലിദാനത്തിനുള്ള ശക്തിയും വേണം. രാജ്യത്ത് കോണ്‍ഗ്രസും ലോകത്തുനിന്ന് കമ്മ്യുണിസവും അപ്രത്യക്ഷമാകുന്നു. ഭാരതത്തില്‍ ബിജെപിക്കു മാത്രമാണ് ഭാവി ഉള്ളതെന്നും അദ്ദേഹം പറഞ്ഞു.
◾മോട്ടോര്‍ വാഹന വകുപ്പ് ഓഫീസുകളില്‍ ഏജന്റുമാര്‍ ഗൂഗിള്‍ പേ അടക്കമുള്ള ഓണ്‍ലൈന്‍ സംവിധാനം വഴിയും കെക്കൂലി നല്‍കുന്നുണ്ടെന്നു വിജിലന്‍സ് കണ്ടെത്തല്‍. ‘ഓപ്പറേഷന്‍ ജാസൂസ്’ എന്ന പേരില്‍ നടത്തിയ റെയ്ഡില്‍ നിന്നാണ് കണ്ടെത്തല്‍. പരിവാഹന്‍ വഴി അപേക്ഷ നല്‍കിയാലും ഉദ്യോഗസ്ഥര്‍ ഏജന്റുമാര്‍ വഴി പണം വാങ്ങുന്നു. പണം നല്‍കുന്നവരുടെ അപേക്ഷ തിരിച്ചറിയാന്‍ പ്രത്യേക അടയാളമുണ്ടെന്നും കണ്ടെത്തി.
*_KSFE_ GOLD LOAN*
*മനുഷ്യപ്പറ്റുള്ള ഗോള്‍ഡ് ലോണ്‍*
നിങ്ങളുടെ അടിയന്തിര സാമ്പത്തിക ആവശ്യങ്ങള്‍ക്ക് *_KSFE_* നല്‍കുന്നു സ്വര്‍ണ പണയ വായ്പ. മിതമായ പലിശ നിരക്കില്‍ ലളിതമായ നടപടിക്രമങ്ങളിലൂടെ 25 ലക്ഷം രൂപ വരെ പ്രതിദിനം നിങ്ങള്‍ക്ക് നേടാം. 12 മാസത്തെ വായ്പാ കാലയളവില്‍ നിശ്ചിത പലിശ അടച്ചതിന് ശേഷം ഒരു വര്‍ഷത്തേക്ക് വായ്പ പുതുക്കാന്‍ കഴിയും, കൂടാതെ പരമാവധി 36 മാസം വരെ ഈ സൗകര്യം ഉപയോഗിക്കാം. *കൂടുതല്‍ വിവരങ്ങള്‍ക്ക് : www.ksfe.com*
◾ഓണക്കാലത്ത് സബ്സിഡി നിരക്കില്‍ നല്‍കേണ്ട അരി നല്‍കാതെ ജനങ്ങളെ സര്‍ക്കാര്‍ കബളിപ്പിക്കുകയാണെന്നു കോണ്‍ഗ്രസ് നേതാവ് രമേശ് ചെന്നിത്തല. ഓണക്കിറ്റ് 60 ശതമാനം കടകളിലും കിട്ടാനില്ല. വെള്ളക്കാര്‍ഡുകാര്‍ക്ക് നല്‍കേണ്ട 10 കിലോ അരിക്കു പകരം രണ്ടു കിലോയാണ് നല്‍കുന്നത്. അതാകട്ടെ അര കിലോ പച്ചരിയും മുക്കാല്‍ കിലോ വീതം വെള്ള അരിയും പുഴക്ക് അരിയും. രണ്ടു കിലോ അരി വാങ്ങാന്‍ മൂന്നു സഞ്ചിയുമായി പോകേണ്ട ഗതികേടിലാണെന്നും ചെന്നിത്തല കുറ്റപ്പെടുുത്തി.
◾എം.ബി രാജേഷ് സ്പീക്കര്‍ സ്ഥാനം രാജിവച്ചു. ഡെപ്യൂട്ടി സ്പീക്കര്‍ ചിറ്റയം ഗോപകുമാറിന് രാജിക്കത്തു കൈമാറി. രാജേഷ് ചൊവ്വാഴ്ച മന്ത്രിയായി സത്യപ്രതിജ്ഞ ചെയ്യും. സ്പീക്കറായി ഷംസീറിനെ തെരഞ്ഞെടുക്കുന്നതുവരെ ഡെപ്യൂട്ടി സ്പീക്കര്‍ക്കായിരിക്കും സ്പീക്കറുടെ ചുമതല.
◾രാജ്യത്തിന്റെ അഭിമാനമായ ഐഎന്‍എസ് വിക്രാന്ത് നിര്‍മിച്ചത് കേരളത്തിലാണെന്നത് എല്ലാ മലയാളിക്കും അഭിമാനിക്കാമെന്ന് വ്യവസായമന്ത്രി പി. രാജീവ്. കേരളത്തില്‍ ഒന്നും നടക്കില്ലെന്ന് നിരന്തരം പ്രചരിപ്പിക്കുന്നവര്‍ രാജ്യത്തിന്റെ അഭിമാനമായ വിക്രാന്ത് കാണണമെന്ന് രാജീവ് ഫേസ്ബുക്കില്‍ കുറിച്ചു.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
➖➖➖➖➖➖➖➖
◾വിദ്യാലയങ്ങളില്‍ ലഹരിക്കെതിരായ പോരാട്ടത്തിന് അധ്യാപകര്‍ മുന്‍നിരയിലുണ്ടാകണമെന്ന് പൊതു വിദ്യാഭ്യാസ മന്ത്രി വി ശിവന്‍കുട്ടി. ലഹരി തടയാന്‍ വിളിച്ച അധ്യാപക സംഘടനാ നേതാക്കളുടെ യോഗത്തിലാണ് മന്ത്രി ഈ ആവശ്യം ഉന്നയിച്ചത്. ജനപ്രതിനിധികള്‍, രക്ഷകര്‍ത്താക്കള്‍, എക്സൈസ് – പോലീസ് ഉദ്യോഗസ്ഥര്‍ എന്നിവരടങ്ങുന്ന സ്‌കൂള്‍ സംരക്ഷണ സമിതി ലഹരി വിരുദ്ധ പ്രവര്‍ത്തനങ്ങള്‍ നിരീക്ഷിക്കണം. ജില്ലാതലത്തില്‍ കളക്ടര്‍ കണ്‍വീനറും ജില്ലാ പഞ്ചായത്ത് പ്രസിഡന്റ് ചെയര്‍മാനും വിദ്യാഭ്യാസ ഡെപ്യൂട്ടി ഡയറക്ടര്‍ ജോയിന്‍ കണ്‍വീനറുമായുള്ള ജില്ലാ സമിതികള്‍ പ്രവര്‍ത്തനങ്ങള്‍ നിരീക്ഷിക്കണമെന്നും മന്ത്രി നിര്‍ദേശിച്ചു.
◾ഉത്തരേന്ത്യയിലെ അഭ്യാസം ഇവിടെ വേണ്ടെന്ന് എന്ഫോഴ്സ്മെന്റ് ഡയറക്ടറേറ്റിനോട് മുന്‍ ധനമന്ത്രി തോമസ് ഐസക്. മസാല ബോണ്ട് കേസില്‍ എന്തിനാണ് ഇഡി സമന്‍സ് അയച്ചത്? എന്തിനാണ് സ്വകാര്യ വിവരങ്ങള്‍ ഹാജരാക്കണമെന്ന് ആവശ്യപ്പെട്ടത്? ഒരു പുല്ലുപേടിയും ഇല്ലെന്നും ഫേസ്ബുക്ക് കുറിപ്പിലൂടെ ഐസക്ക് പറഞ്ഞു.
◾മലപ്പുറം ജില്ലയില്‍ 733 എല്‍പി സ്‌കൂള്‍ അധ്യാപകര്‍ക്ക് സ്ഥിരനിയമനം നല്‍കി പൊതുവിദ്യാഭ്യാസ വകുപ്പ്. എല്‍ പി എസ് ടി നിയമനത്തിലൂടെ സംസ്ഥാനതലത്തില്‍ ഏറ്റവും കൂടുതല്‍ അധ്യാപകര്‍ക്ക് നിയമനം നല്‍കിയതു മലപ്പുറം ജില്ലയിലാണെന്ന് ജില്ലാ ഉപവിദ്യാഭ്യാസ ഡയറക്ടര്‍ കെ.പി രമേശ് കുമാര്‍ പറഞ്ഞു.
◾കോഴിക്കോട് കോര്‍പറേഷന്റെ ഉടമസ്ഥതയിലുള്ള ടാഗോര്‍ ഹാളിന് ഇലക്ട്രിക്ക് ഫിറ്റ്നസ് ഇല്ലാത്തതിനാല്‍ അവിടെ നടക്കുന്ന പരിപാടിക്കു പോകരുതെന്ന് സുരക്ഷാ നിര്‍ദേശം. ഗോവ ഗവര്‍ണര്‍ പി.എസ്. ശ്രീധരന്‍പിള്ളയ്ക്കാണ് ഇങ്ങനെ സുരക്ഷാ ഉപദേശം ലഭിച്ചത്. ഗോവ ഗവര്‍ണര്‍ ടാഗോര്‍ ഹാളിലെ പരിപാടി റദ്ദാക്കി.
◾അത്യാധുനിക സുരക്ഷാ സജ്ജീകരണങ്ങളുള്ള പുതിയ ആഡംബര ഹെലികോപ്റ്റര്‍ സ്വന്തമാക്കി ജോയ് ആലുക്കാസ്. 90 കോടി രൂപ വില വരുന്ന ലിയോനാഡോ എ ഡബ്ല്യു 109 ഗ്രാന്റ് ന്യൂ ഇരട്ട എന്‍ജിന്‍ കോപ്റ്ററാണ് ജോയ് ആലുക്കാസ് തൃശൂരിലെത്തിച്ചത്. രണ്ടു പൈലറ്റുമാര്‍ക്കും ഏഴു യാത്രക്കാര്‍ക്കും പറക്കാം. മണിക്കൂറില്‍ 289 കിലോമീറ്റര്‍ വേഗത്തില്‍ നാലര മണിക്കൂര്‍ വരെ തുടര്‍ച്ചയായി പറക്കാം. ശബ്ദം കുറവാണ്. ഓട്ടോമാറ്റിക് നാവിഗേഷന്‍, ഡിജിറ്റല്‍ ഓട്ടോ പൈലറ്റ്, കുറഞ്ഞ വെളിച്ചത്തിലും കാണാവുന്ന ഇവിഎസ്, കാര്‍ഗോ ഹുക്ക് കാമറകള്‍, മഴയിലും മഞ്ഞിലും രാത്രിയിലും പറക്കല്‍പാത വ്യക്തമാക്കുന്ന ത്രിമാന സംവിധാനം എന്നീ സൗകര്യങ്ങള്‍ ഈ ഹെലികോപ്റ്ററിനുണ്ട്.
◾വ്യവസായിയെ തട്ടിക്കൊണ്ടുപോയി 42 ലക്ഷം രൂപ മോചന ദ്രവ്യം ആവശ്യപെട്ട കേസില്‍ എറണാകുളം കുന്നത്തുനാടില്‍ മൂന്നു പേര്‍ പിടിയിലായി. ഒറ്റപ്പാലം സ്വദേശി ബിനീഷ്, തിരുപ്പൂര്‍ സ്വദേശി സന്തപ്പെട്ട ശിവ, കഞ്ചിക്കോട് സ്വദേശി ശ്രീനാഥ് എന്നിവരെയാണ് കുന്നത്തുനാട് പൊലീസ് പിടികൂടിയത്. നെല്ലാട് സ്വദേശിയായ ആയുര്‍വേദ മരുന്ന് കമ്പനി ഉടമയെ തമിഴ്നാട്ടിലേക്ക് വിളിച്ചു വരുത്തിയാണ് ബന്ദിയാക്കിയത്.
◾വ്യാജ കോള്‍ സെന്റര്‍ വഴി ഓണ്‍ലൈന്‍ തട്ടിപ്പു നടത്തിയ രണ്ടു മലയാളികള്‍ അടക്കമുള്ള നാലംഗ സംഘത്ത വയനാട് സൈബര്‍ പോലീസ് ഡല്‍ഹിയില്‍നിന്ന് അറസ്റ്റ് ചെയ്തു. എറണാകുളം സ്വദേശിയും ഡല്‍ഹിയില്‍ സ്ഥിരതമസക്കാരനുമായ അഭിഷേക് അനില്‍, പത്തനംതിട്ട സ്വദേശി പ്രവീണ്‍, ബീഹാര്‍ സ്വദേശി സിന്റു ശര്‍മ്മ, തമിഴ്‌നാട് സേലം സ്വദേശി അമന എന്നിവരാണ് റിമാന്‍ഡിലായത്. ഓണ്‍ലൈനിലൂടെ സാധനങ്ങള്‍ വാങ്ങിയവര്‍ക്കു നറുക്കെടുപ്പിലൂടെ സമ്മാനമുണ്ടെന്ന് വിശ്വസിപ്പിച്ചാണ് തട്ടിപ്പു നടത്തിയിരുന്നത്.
◾കൊല്ലം ഏരൂരില്‍ ബലാത്സംഗത്തിനിടെ വീട്ടമ്മയെ കൊലപ്പെടുത്തിയ കേസിലെ പ്രതി ആറു മാസങ്ങള്‍ക്കുശേഷം പിടിയില്‍. വിളക്കുപ്പാറ സ്വദേശി മോഹനനെയാണ് പിടികൂടിയത്. മദ്യലഹരിയിലെ പൊങ്ങച്ച സംസാരത്തിനിടെ ബലാല്‍സംഗത്തിന്റേയും കൊലപാതകത്തിന്റേയും വിശേഷം ചിലരോടു പറഞ്ഞിരുന്നു. ഇതു പോലീസിന്റെ ചെവിയിലെത്തിയതോടെയാണ് അറസ്റ്റു ചെയ്തത്. ഫെബ്രുവരി 26 നാണ് വീട്ടമ്മ കൊല്ലപ്പെട്ടത്.
◾കണ്ണൂര്‍ സെന്‍ട്രല്‍ ജയിലില്‍ കാപ്പ തടവുകാര്‍ തമ്മില്‍ കൂട്ടത്തല്ല്. ഏറ്റുമുട്ടിയവരെ ജയില്‍ മാറ്റി. കോട്ടയം സ്വദേശികളായ ജയേഷ്, അബിന്‍, സുജേഷ് ഏറണാകുളത്തെ ശ്രീജിത്ത്, കണ്ണൂര്‍ സിറ്റിയിലെ അതുല്‍ ജോണ്‍ റൊസാരിയോ എന്നിവരാണ് അടിപിടിയുണ്ടാക്കിയത്. ജയേഷിനെ ജില്ലാ ജയിലിലേക്കും അബിനിനെ സ്പെഷല്‍ സബ് ജയിലിലേക്കും മാറ്റി.
◾കോഴിക്കോട് മെഡിക്കല്‍ കോളജ് ആശുപത്രിയിലെ സുരക്ഷാ ജീവനക്കാരെ മര്‍ദിച്ച കേസില്‍ പ്രതികളായ ഡിവൈഎഫ്ഐ പ്രവര്‍ത്തകര്‍ മുന്‍കൂര്‍ ജാമ്യം തേടി കോടതിയില്‍. ഒന്നാം പ്രതി കെ അരുണ്‍ ഉള്‍പ്പടെ നാലു പേരാണ് കോഴിക്കോട് ജില്ലാ കോടതിയില്‍ മുന്‍കൂര്‍ ജാമ്യപേക്ഷ നല്‍കിയത്.
◾പീഡിപ്പിച്ചെന്ന പരാതിയിലെ എല്ലാവര്‍ക്കുമെതിരേ അന്വേഷണം നടത്തിയില്ലെന്ന് ആരോപിച്ച് സോളാര്‍ തട്ടിപ്പുകേസിലെ പ്രതി ഹൈക്കോടതിയില്‍. 18 പേര്‍ ലൈഗികമായി പീഡിപ്പിച്ചെന്നു പരാതി നല്‍കിയിട്ടും നാലു പേര്‍ക്കെതിരേ മാത്രമാണു സിബിഐ കേസെടുത്ത് അന്വേഷണം നടത്തിയതെന്നാണ് ആരോപണം. ഹൈബി ഈഡനെതിരേ രജിസ്റ്റര്‍ ചെയ്ത കേസില്‍ തെളിവില്ലെന്നു സിബിഐ കോടതിയില്‍ റിപ്പോര്‍ട്ടു നല്‍കിയിരുന്നു.
◾സോളാര്‍ പീഡനപരാതിയില്‍ ഉമ്മന്‍ ചാണ്ടിക്കെതിരെയുള്ള കേസില്‍ പി.സി ജോര്‍ജ് രഹസ്യമൊഴി നല്‍കി തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതിയിലാണ് മൊഴി നല്‍കിയത്.
◾ഓണാഘോഷത്തിനു മുണ്ടു ധരിച്ചതിനു പ്ലസ് വണ്‍ വിദ്യാര്‍ത്ഥികളുമായി കൂട്ടത്തല്ലുണ്ടാക്കി പ്ലസ് ടു വിദ്യാര്‍ത്ഥികള്‍. നിലമ്പൂര്‍ മാനവേദന്‍ ഹയര്‍സെക്കന്‍ഡറി സ്‌കൂളിലെ ഓണാഘോഷമാണു കൂട്ടത്തല്ലില്‍ കലാശിച്ചത്. അടിപിടിയുടെ ദൃശ്യങ്ങള്‍ സോഷ്യല്‍മീഡിയയില്‍ വൈറലായി.
◾കോഴിക്കോട് കുന്നമംഗലം പഞ്ചായത്ത് മുസ്ലിം ലീഗ് ഓഫീസില്‍ തീപിടിത്തം. അഗ്‌നിശമനസേന എത്തിയാണു തീയണച്ചത്.
◾തൃശൂര്‍ പാലപ്പിള്ളിയിലെ ജനവാസ മേഖലയിറങ്ങുന്ന കാട്ടാനകളെ തുരത്താന്‍ കുങ്കിയാനകളെത്തി. വയനാട് വന്യജീവി സങ്കേതത്തിലെ ഭരത്, വിക്രം എന്നീ കുങ്കിയാനകളെയാണ് പാലപ്പിള്ളിയിലെത്തിച്ചത്. ഇന്നു മുതല്‍ ആനകളെ കാടു കയറ്റാനുള്ള ദൗത്യം കുങ്കിയാനകള്‍ ആരംഭിക്കും.
◾കഴിഞ്ഞ വര്‍ഷം ഇന്ത്യയില്‍ വിവിധ റോഡപകടങ്ങളില്‍ മരിച്ചത് ഒന്നര ലക്ഷം പേര്‍. 4,22,659 അപകടങ്ങളിലായി 1,55,622 പേര്‍ കൊല്ലപ്പെട്ടു. മുന്‍ വര്‍ഷത്തെ അപേക്ഷിച്ച് 14.6 ശതമാനം വര്‍ധന. 3,71,884 പേര്‍ക്ക് പരുക്കേറ്റു. ഇരുചക്രവാഹന അപകടങ്ങളില്‍ 69,240 പേരാണു മരിച്ചത്. റോഡപകട മരണങ്ങളുടെ 44.5 ശതമാനവും ഇരുചക്ര വാഹനാപകടങ്ങളിലൂടെയാണ്. കാറപകടങ്ങളിലായി 23,531 പേര്‍ മരിച്ചു.
◾വിലക്കയറ്റത്തിനെതിരെ നാളെ ഡല്‍ഹിയില്‍ കോണ്‍ഗ്രസ് റാലി. രാംലീല മൈതാനിയില്‍ പതിനായിര കണക്കിന് പ്രവര്‍ത്തകര്‍ പങ്കെടുക്കുമെന്ന് കോണ്‍ഗ്രസ് ജനറല്‍ സെക്രട്ടറി കെ.സി വേണുഗോപാല്‍ പറഞ്ഞു.
◾റേഷന്‍ കടയില്‍ പ്രധാനമന്ത്രി നരേന്ദ്ര മോദിയുടെ ചിത്രം വയ്ക്കാത്തതിനു കളക്ടറോട് ക്ഷുഭിതയായി കേന്ദ്ര ധന മന്ത്രി നിര്‍മല സീതാരാമന്‍. തെലങ്കാനയിലെ കാമറെഡ്ഡി കളക്ടറായ ജിതേഷ് പാട്ടീലിനോടാണ് ജനത്തിനു മുന്നില്‍ കേന്ദ്രമന്ത്രി കയര്‍ത്തത്. പ്രധാനമന്ത്രി ഗരീബ് കല്യാണ്‍ യോജന പ്രകാരം ദരിദ്ര വിഭാഗങ്ങള്‍ക്ക് സൗജന്യമായി അരി നല്‍കിയിട്ടും അദ്ദേഹത്തിന്റെ ചിത്രം വയ്ക്കാത്തത് എന്തുകൊണ്ടാണെന്നായിരുന്നു നിര്‍മ്മല സീതാരാമന്റെ ചോദ്യം.
◾പ്രതിപക്ഷ ഐക്യമുണ്ടാക്കാന്‍ ബിഹാര്‍ മുഖ്യമന്ത്രി നിതീഷ്‌കുമാര്‍ ദേശീയതലത്തിലുള്ള പ്രതിപക്ഷ നേതാക്കളെ സന്ദര്‍ശിക്കുന്നു. അടുത്ത ലോക്സഭാ തെരഞ്ഞെടുപ്പില്‍ പ്രതിപക്ഷത്തിന്റെ പ്രധാനമന്ത്രി സ്ഥാനാര്‍ത്ഥിയാകാനുള്ള നീക്കങ്ങളുമായാണ് നിതീഷ് നേതാക്കളെ കാണുന്നത്. വ്യാഴാഴ്ച എന്‍സിപി നേതാവ് ശരത് പവാറുമായും പിറകേ, സോണിയാഗാന്ധിയുമായും ചര്‍ച്ച നടത്തുമെന്ന് ജനതാദള്‍ യു അറിയിച്ചു.
◾സംഗീതജ്ഞന്‍ പത്മഭൂഷണ്‍ ടി.വി. ശങ്കരനാരായണന്‍ ചെന്നൈയില്‍ അന്തരിച്ചു. 77 വയസായിരുന്നു.
◾റേസര്‍പേ, പേടിഎം, ക്യാഷ് ഫ്രീ തുടങ്ങിയ ഓണ്‍ലൈന്‍ പേയ്‌മെന്റ് ആപ്പുകളുടെ ബെഗളൂരു ഓഫീസുകളില്‍ എന്ഫോഴ്സ്മെന്റ് ഡയറക്ടറേറ്റിന്റെ റെയ്ഡ്. നിയമവിരുദ്ധമായ പണമിടപാടുകളെക്കുറിച്ചുള്ള അന്വേഷണവുമായാണ് പരിശോധന നടത്തിയത്.
◾പീഡനക്കേസില്‍ ജാമ്യത്തിലിറങ്ങി മുങ്ങി രാജ്യംവിട്ട് സ്വന്തമായി രാജ്യം സ്ഥാപിച്ച വിവാദ ആള്‍ദൈവം നിത്യാനന്ദ സ്വാമി ശ്രീലങ്കയില്‍ രാഷ്ട്രീയ അഭയം തേടി. കര്‍ണാടകയില്‍ നിലവിലുള്ള കേസുകള്‍ക്ക് ഇന്റര്‍പോളിന്റെ തെരച്ചില്‍ നോട്ടീസ് നിലവിലുള്ള പ്രതിയാണ് ഇയാള്‍. ഒരു അന്വേഷണ ഏജന്‍സിക്കും എത്താനാകാത്ത കൈലാസത്തിലാണു താനെന്നാണ് ഇയാളുടെ അവകാശവാദം.
◾പാകിസ്ഥാന്റെ വിദേശ വായ്പയുടെ 30 ശതമാനവും ചൈനയില്‍നിന്നാണെന്ന് അന്താരാഷ്ട്ര നാണ്യനിധി. ഫെബ്രുവരിക്കു ശേഷം വായ്പാ ബാധ്യത മൂന്നു ശതമാനം ഉയര്‍ന്നു. ഫെബ്രുവരിയില്‍ ആകെ കടത്തില്‍ 27 ശതമാനം ചൈനയ്ക്കു തിരിച്ചുകൊടുക്കാനുള്ളതായിരുന്നു. ഇപ്പോള്‍ 3000 കോടി ഡോളറാണ് പാകിസ്ഥാന്‍ ചൈനയ്ക്കു കൊടുക്കാനുള്ളത്.
◾അമേരിക്കയിലെ മിസിസിപ്പിയില്‍ തട്ടിയെടുത്ത വിമാനവുമായി വട്ടമിട്ടു പറന്ന് വാള്‍മാര്‍ട്ട് സ്റ്റോറിലേക്ക് ഇടിച്ചിറക്കുമെന്നു ഭീഷണിപ്പെടുത്തിയയാള്‍ അറസ്റ്റിലായി. ടുപേളോ വിമാനത്തവാളത്തില്‍നിന്ന് ചെറുവിമാനം തട്ടിയെടുത്തു പറന്ന 29 കാരനായ പൈലറ്റാണ് ഇന്ധനം തീര്‍ന്നപ്പോള്‍ വയലില്‍ ഇറക്കിയതോടെ പിടിയിലായത്.
◾ഏഷ്യാ കപ്പ് ക്രിക്കറ്റിലെ സൂപ്പര്‍ ഫോറില്‍ അഫ്ഗാനിസ്ഥാനെ നാല് വിക്കറ്റിന് തോല്‍പിച്ച് ശ്രീലങ്ക. അഫ്ഗാന്‍ ഉയര്‍ത്തിയ 176 റണ്‍സ് വിജയലക്ഷ്യം ശ്രീലങ്ക 19.1 ഓവറില്‍ ആറ് വിക്കറ്റ് നഷ്ടത്തില്‍ അടിച്ചെടുത്തു. സൂപ്പര്‍ ഫോറില്‍ ഇന്ന് ഇന്ത്യ പാകിസ്ഥാനുമായി വീണ്ടും ഏറ്റുമുട്ടും. രാത്രി 7.30 നാണ് മത്സരം ആരംഭിക്കുക.
◾വെസ്റ്റിന്‍ഡീസ് ഇതിഹാസം ബ്രയാന്‍ ലാറ ഇനി സണ്‍റൈസേഴ്‌സ് ഹൈദരാബാദിന്റെ മുഖ്യ പരിശീലകന്‍. ടോം മൂഡിയെ പരിശീലക സ്ഥാനത്ത് നിന്ന് മാറ്റിയാണ് ലാറയുടെ നിയമനം. നേരത്തെ ഹൈദരാബാദ് ടീമിന്റെ ബാറ്റിങ് കോച്ചും സ്ട്രാറ്റജിക് അഡൈ്വസറുമായിരുന്നു ലാറ.
◾ഇന്ത്യയുടെ വിദേശനാണയ കരുതല്‍ ശേഖരം ആഗസ്റ്റ് 26ന് സമാപിച്ച ആഴ്ചയില്‍ 300 കോടി ഡോളര്‍ ഇടിഞ്ഞ് 56,104.6 കോടി ഡോളറിലെത്തി. കഴിഞ്ഞ ഏപ്രില്‍ മുതല്‍ ഇതുവരെ വിദേശ നാണയശേഖരത്തിലുണ്ടായ ഇടിവ് 4,500 കോടി ഡോളറാണ്. 49,864.5 കോടി ഡോളറാണ് വിദേശ കറന്‍സി ആസ്തി (എഫ്.സി.എ); ഇടിവ് 257.1 കോടി ഡോളര്‍. കരുതല്‍ സ്വര്‍ണശേഖരം 27.1 കോടി ഡോളര്‍ താഴ്ന്ന് 3,964.3 കോടി ഡോളറായി. ഡോളറിനെതിരെ രൂപയുടെ തളര്‍ച്ചയുടെ ആക്കം കുറയ്ക്കാന്‍ റിസര്‍വ് ബാങ്ക് വന്‍തോതില്‍ ഡോളര്‍ വിറ്റഴിച്ചതാണ് വിദേശ നാണയശേഖരം കുറയാന്‍ ഇടയാക്കിയത്.
◾ഇന്ത്യയിലെ യു.പി.ഐ പണമിടപാടുകള്‍ ആഗസ്റ്റില്‍ കുറിച്ചത് പുതിയ ഉയരം. ഇടപാടുകളുടെ എണ്ണം ജൂലായിലെ 629 കോടിയേക്കാള്‍ 4.5 ശതമാനം ഉയര്‍ന്ന് കഴിഞ്ഞമാസം 657 കോടിയിലെത്തി. ഇടപാട് മൂല്യം 10.63 ലക്ഷം കോടി രൂപയില്‍ നിന്ന് 10.73 ലക്ഷം കോടി രൂപയായി; വര്‍ദ്ധന 0.92 ശതമാനമാണെന്ന് നാഷണല്‍ പേമെന്റ്‌സ് കോര്‍പ്പറേഷന്‍ ഒഫ് ഇന്ത്യ വ്യക്തമാക്കി. യു.പി.ഐ ഇടപാടുകള്‍ ആദ്യമായി 600 കോടി കടന്നത് കഴിഞ്ഞ ജൂണിലാണ്. അതേസമയം, കഴിഞ്ഞമാസം ആധാര്‍ അധിഷ്ഠിത പേമെന്റുകള്‍ 10.6 കോടിയായി കുറഞ്ഞു. ജൂണില്‍ 12.1 കോടിയും ജൂലായില്‍ 11 കോടിയുമായിരുന്നു. ഇടപാട് മൂല്യം ഇക്കാലയളവില്‍ 16.1 ശതമാനം കുറഞ്ഞ് 27,186 കോടി രൂപയായി. കഴിഞ്ഞവര്‍ഷം ആഗസ്റ്റിനെ അപേക്ഷിച്ച് കഴിഞ്ഞമാസം യു.പി.ഐ ഇടപാടുകളിലുണ്ടായ വര്‍ദ്ധന 84.6 ശതമാനമാണ്. ഇടപാട് മൂല്യം 67.9 ശതമാനവും ഉയര്‍ന്നു. നടപ്പു സാമ്പത്തിക വര്‍ഷം (2022-23) ഇതുവരെ നടന്നത് 4,481 കോടി യു.പി.ഐ ഇടപാടുകളാണ്; മൂല്യം 77.9 ലക്ഷം കോടി രൂപ. 2021-22ല്‍ ഇടപാടുകള്‍ 4,597 കോടിയും മൂല്യം 84.2 ലക്ഷം കോടി രൂപയുമായിരുന്നു.
◾ഓണത്തിന് കിടിലനൊരു ഓണപ്പാട്ട് ആശംസകളുമായി ധ്യാന്‍ ശ്രീനിവാസന്‍ നായകനാവുന്ന ‘ബുള്ളറ്റ് ഡയറീസ്’ സിനിമ ടീം. ഓണം വിത്ത് ജിന്ന് എന്ന് പേരിട്ടിരിക്കുന്ന ഓണപ്പാട്ട് ആലപിച്ചിരിക്കുന്നത് ജാസി ഗിഫ്റ്റും ഗോകുലും ചേര്‍ന്നാണ്. ഓണത്തിന് കേരളത്തിലേക്ക് വരുന്ന മാവേലിയുടെ ഒരുക്കവും കൂട്ടിന് ഇത്തവണ ജിന്നും എത്തുന്നതാണ് മ്യൂസിക് ആല്‍ബത്തിന്റെ തീം. ബി3എം ക്രിയേഷന്‍സിന്റെ ബാനറിലാണ് വീഡിയോ നിര്‍മ്മിച്ചിരിക്കുന്നത്. നോബിനും ഇംതിയാസ് അബൂബക്കറും ചേര്‍ന്ന് കോണ്‍സപ്റ്റ് തയ്യാറാക്കിയ ഈ വ്യത്യസ്ത മ്യൂസിക് വീഡിയോ സംവിധാനം ചെയ്തത് ഇംതിയാസ് അബൂബക്കറാണ്. ധ്യാന്‍ ശ്രീനിവാസനും പ്രയാഗാ മാര്‍ട്ടിനുംകേന്ദ്രകഥാപാത്രങ്ങളെ അവതരിപ്പിക്കുന്ന ‘ബുള്ളറ്റ് ഡയറീസ്’ സന്തോഷ് മണ്ടൂര്‍ ആണ് തിരക്കഥ രചിച്ച് സംവിധാനം ചെയ്യുന്നത്. ഷാന്‍ റഹ്‌മാനാണ് ചിത്രത്തിന്റെ സംഗീത സംവിധാനം.
◾രക്ഷിത് ഷെട്ടി നായകനായ കന്നഡ ചിത്രം കിറിക് പാര്‍ട്ടിയിലൂടെ അരങ്ങേറ്റം കുറിച്ച നടിയാണ് രശ്മിക മന്ദാന. ആറ് വര്‍ഷത്തെ കരിയറിനിടയില്‍ കന്നഡയിലും തെലുങ്കിലും തമിഴിലുമായി 15 ചിത്രങ്ങള്‍ രശ്മിക പൂര്‍ത്തിയാക്കിക്കഴിഞ്ഞു. ഇപ്പോഴിതാ ബോളിവുഡിലേക്കും എത്തുകയാണ് അവര്‍. ബോളിവുഡിലെ അരങ്ങേറ്റചിത്രം അമിതാഭ് ബച്ചനൊപ്പമാണ്. ഗുഡ്ബൈ എന്നു പേരിട്ടിരിക്കുന്ന ചിത്രത്തിന്റെ ഫസ്റ്റ് ലുക്ക് പുറത്തെത്തി. ഫാമിലി കോമഡി ഡ്രാമ വിഭാഗത്തില്‍ പെടുന്ന ചിത്രം സംവിധാനം ചെയ്യുന്നത് വികാസ് ബാല്‍ ആണ്. നീന ഗുപ്ത, സുനില്‍ ഗ്രോവര്‍, പാവൈല്‍ ഗുലാത്തി, ഷിവിന്‍ നരംഗ്, സാഹില്‍ മെഹ്ത, അഭിഷേക് ഖാന്‍, എല്ലി അവ്റാം, ടീട്ടു വര്‍മ്മ, പായല്‍ ഥാപ്പ, രജ്നി ബസുമടരി, ഷയാങ്ക് ശുക്ല, ഹന്‍സ സിംഗ് എന്നിവരാണ് മറ്റു കഥാപാത്രങ്ങളെ അവതരിപ്പിച്ചിരിക്കുന്നത്. ഒക്ടോബര്‍ 7 ആണ് റിലീസ് തീയതി.
◾ജാപ്പനീസ് ഇരുചക്ര വാഹന ബ്രാന്‍ഡായ ഹോണ്ട മോട്ടോര്‍സൈക്കിള്‍ ആന്‍ഡ് സ്‌കൂട്ടര്‍ ഇന്ത്യയുടെ 2022 ആഗസ്റ്റ് മാസത്തെ ആകെ വില്‍പന ഏഴ് ശതമാനം വര്‍ധിച്ച് 4,62,523 യൂണിറ്റിലെത്തി. ഇതില്‍ 4,23,216 യൂണിറ്റ് ആഭ്യന്തര വില്‍പനയും 39,307 യൂണിറ്റ് കയറ്റുമതിയുമായിരുന്നു. 2021 ആഗസ്റ്റില്‍ ആകെ വിറ്റഴിച്ച 4,31,594 യൂണിറ്റുകളില്‍ 4,01,480 യൂണിറ്റ് ആഭ്യന്തര വില്‍പനയും 30,114 യൂണിറ്റ് കയറ്റുമതിയായിരുന്നു എന്നും കമ്പനി വാര്‍ത്താക്കുറിപ്പില്‍ അറിയിച്ചു. മുന്‍ മാസത്തെയും കഴിഞ്ഞ വര്‍ഷം ഇതേ കാലയളവിനെയും താരമത്യം ചെയ്യുമ്പോള്‍ കമ്പനിയുടെ പ്രകടനം സ്ഥിരത കൈവരിയ്ക്കുകയാണ്. എല്ലാ കേന്ദ്രങ്ങളിലും ലഭ്യമായ ആകര്‍ഷകമായ വായ്പാ പദ്ധതികള്‍ ആഘോഷങ്ങള്‍ ഇരട്ടിയാക്കും.
◾ഒമ്പതാം വയസ്സില്‍ മനുഷ്യക്കടത്തുകാരനായി മാറിയ ഗാസയുടെ കഥയാണ് ഈ നോവല്‍. അഫ്ഗാനിസ്ഥാന്‍, സിറിയ തുടങ്ങിയ രാജ്യങ്ങളില്‍ യുദ്ധാനന്തര ദുരിതങ്ങളില്‍പെട്ടുഴറുന്ന മനുഷ്യരെ ടര്‍ക്കിയിലൂടെ ഗ്രീസിലേക്കും നടക്കാന്‍ സാധ്യതയില്ലാത്ത പ്രത്യാശയിലേക്കും എത്തിക്കുന്ന മനുഷ്യക്കടത്ത് ചങ്ങലയുടെ കണ്ണിയാണ് ഗാസയുടെ പിതാവ്. കഥ ഉരുത്തിരിയുന്നത് ഗാസയുടെ കണ്ണുകളിലൂടെയാണ്. അതിബുദ്ധിശാലിയും സ്‌കൂളിലെ ഒന്നാംസ്ഥാനക്കാരനുമായ ഗാസ എന്ന കേന്ദ്രകഥാപാത്രം സ്വന്തം അച്ഛന്റെ അവഗണനയാലും മറ്റു പല സാഹചര്യങ്ങളാലും നിഷ്ഠൂരനായ ഒരു സാഡിസ്റ്റ്ആയി പരിണമിക്കുന്നതിന്റെ നേര്‍ക്കണ്ണാടിയാണ്, ടര്‍ക്കിയിലെ പുതുതലമുറ എഴുത്തുകാരില്‍ മുന്‍പന്തിയില്‍ നില്‍ക്കുന്ന ഹകന്‍ ഗുണ്ടായ്യുടെ ഈ കൃതി. ‘പോരാ പോരാ’. വിവര്‍ത്തനം: രമാമേനോന്‍. ഗ്രീന്‍ ബുക്സ്. വില 522 രൂപ.
◾അരക്കെട്ടിന്റെ വലുപ്പം ഓരോ ഇഞ്ച് വര്‍ധിക്കുമ്പോഴും ഹൃദയാഘാത സാധ്യത 10 ശതമാനം കൂടുമെന്നാണ് അടുത്തിടെ നടത്തിയ ഒരു പഠനം പറയുന്നത്. ഓക്സ്ഫോഡ് സര്‍വകലാശാല ആണ് പഠനം നടത്തിയത്. കുടവയറുള്ളവര്‍ക്ക് മറ്റുള്ളവരെ അപേക്ഷിച്ച് ഹൃദയാഘാതം ഉണ്ടാകാനുള്ള സാധ്യത 3.21 മടങ്ങ് അധികമാണെന്നും യൂറോപ്യന്‍ സൊസൈറ്റി ഓഫ് കാര്‍ഡിയോളജിയില്‍ അവതരിപ്പിച്ച ഈ ഗവേഷണറിപ്പോര്‍ട്ടില്‍ പറയുന്നു. അമിതഭാരമുള്ളവര്‍ക്ക് മറ്റുള്ളവരെ അപേക്ഷിച്ച് ഹൃദ്രോഗ പ്രശ്നം വരാനുള്ള സാധ്യത 2.65 മടങ്ങ് അധികമാണെന്നും പഠനം പറയുന്നു. കൊഴുപ്പും കാര്‍ബോഹൈട്രേറ്റും പഞ്ചസാരയും അടങ്ങിയ ഭക്ഷണങ്ങള്‍ ഒഴിവാക്കുകയും കലോറി വളരെ കുറഞ്ഞ ഭക്ഷണങ്ങളും പ്രോട്ടീനും ഫൈബറും ഡയറ്റില്‍ ഉള്‍പ്പെടുത്തിയാല്‍ കുടവയര്‍ കുറയ്ക്കാന്‍ കഴിയും. വയറ് കുറയ്ക്കാന്‍ ആഗ്രഹിക്കുന്നവര്‍ നിര്‍ബന്ധമായും ചോറ് ഒഴിവാക്കുക. ചോറില്‍ കാര്‍ബോഹൈഡ്രേറ്റ് കൂടുതല്‍ അടങ്ങിയിട്ടുണ്ട്. ആദ്യം ചോറ് ഒരു നേരമാക്കുക. പതിയെ ഒരു നേരത്തെ ചോറിന്റെ അളവും കുറയ്ക്കുക. ഭക്ഷണത്തില്‍ നിന്ന് പഞ്ചസാര ഒഴിവാക്കുക. പഞ്ചസാര അധികമായി ചേര്‍ത്തിട്ടുള്ള ഭക്ഷണം ഭാരം വര്‍ധിപ്പിക്കും. രാത്രി ഭക്ഷണം വൈകി കഴിക്കുന്നത് കുടവയര്‍ കൂട്ടും. ഭക്ഷണം കഴിച്ച ഉടന്‍ കിടന്നുറങ്ങാന്‍ പോകുന്നതിലൂടെ ശരീരത്തില്‍ അടിഞ്ഞുകൂടുന്ന കൊഴുപ്പ് ഊര്‍ജമായി പോകാനുള്ള സാധ്യത ഇല്ലാതാകും. കുടവയര്‍ കുറയ്ക്കാന്‍ ആഗ്രഹിക്കുന്നവര്‍ ശീതളപാനീയങ്ങള്‍ ഒഴിവാക്കണം. ദിവസവും ഇത് കുടിക്കുന്നത് അമിതവണ്ണത്തിനും വിസറല്‍ ഫാറ്റ് അടിഞ്ഞുകൂടുന്നതിനും കാരണമാകുന്നുവെന്ന് ഒട്ടേറെ പഠനങ്ങളുണ്ട്. വെള്ളം ധാരാളം കുടിക്കുന്നതും ശരീരഭാരം കുറയ്ക്കാന്‍ സഹായിക്കും. ഭക്ഷണം കഴിക്കുന്നതിനു മുന്‍പെ വെള്ളം കുടിച്ചാല്‍ വയറു നിറഞ്ഞതായി തോന്നും. അതുകൊണ്ട് കുറച്ചു കാലറി മാത്രമേ ശരീരത്തിലെത്തുകയുള്ളൂ. ഇത് ശരീരഭാരം കുറയാനും സഹായിക്കും. നാരുകള്‍ ധാരാളം അടങ്ങിയ ഭക്ഷണം കഴിക്കാന്‍ പ്രത്യേകം ശ്രദ്ധിക്കണം. ഭക്ഷ്യനാരുകള്‍ ദഹനം മെച്ചപ്പെടുത്തുന്നതോടൊപ്പം ഏറെ നേരം വയര്‍ നിറഞ്ഞതായും തോന്നിപ്പിക്കും. വ്യായാമം ശീലമാക്കുക. പുകവലി, മദ്യപാനം തുടങ്ങിയ ഉപേക്ഷിക്കുക. മാനസിക സമ്മര്‍ദം ഒഴിവാക്കാന്‍ മെഡിറ്റേഷന്‍ പോലുള്ള ധ്യാനമുറകള്‍ പരിശീലിക്കുക.
*ശുഭദിനം*
*കവിത കണ്ണന്‍*
അയാള്‍ ഒരുപ്രതിമ വില്‍പനക്കാരന്‍ ആയിരുന്നു. രാജാവും പരിവാരങ്ങളും അവയുടെ വില ചോദിച്ചു. ആദ്യത്തെ പ്രതിമയ്ക്ക് ഒരു ലക്ഷം രൂപയും രണ്ടാമത്തേതിന് പതിനായിരം രൂപയും മൂന്നാമത്തേതിന് നൂറു രൂപയുമാണ്. പ്രതിമകള്‍ തമ്മില്‍ ഒരു വ്യത്യാസവും ഉണ്ടായിരുന്നില്ല. എല്ലാവരും ചിന്താക്കുഴപ്പത്തിലായി. വില്‍പനക്കാരന്‍ ഒരു കുഴല്‍ പ്രതിമയുടെ ചെവിക്കുള്ളിലൂടെ ഇട്ടപ്പോള്‍ അത് വായ് തുറന്ന് എന്തൊക്കെയോ പറയാന്‍ ശ്രമിച്ചു. രണ്ടാമത്ത പ്രതിമയുടെ ചെവിയിലൂടെ കുഴലിട്ടപ്പോള്‍ അതു മറ്റേ ചെവിയിലൂടെ പുറത്തുവന്നു. മൂന്നാമത്തെ പ്രതിമയുടെ ചെവിയിലൂടെ ഇട്ടപ്പോള്‍ കുഴല്‍ ആമാശയത്തിലെത്തി. ഒരു തവണ മാത്രം വായ് തുറന്നു. വില്‍പനക്കാരന്‍ വിശദീകരിച്ചു. ആദ്യപ്രതിമ കേള്‍ക്കുന്നതെല്ലാം വിളിച്ചുപറയും. രണ്ടാം പ്രതിമ കേട്ടതെല്ലാം പുറത്തുകളയും മൂന്നാം പ്രതിമ എല്ലാം മനസ്സിലാക്കി ഉറപ്പുവരുത്തിയവ മാത്രം പുറത്ത് പറയും. അതാണ് വില വ്യത്യാസം. കേള്‍ക്കുന്ന ശബ്ദങ്ങള്‍ നിയന്ത്രിക്കാനാകില്ല. പക്ഷേ, പുറപ്പെടുവിക്കുന്ന ശബ്ദങ്ങള്‍ നിയന്ത്രിക്കാനാകും.. താല്‍പര്യമില്ലാത്ത കാര്യങ്ങള്‍ക്കും ചെവികൊടുക്കേണ്ടിവരും.. കാതിനുള്ളില്‍ എന്തൊക്കെ പ്രവേശിക്കുന്നു എന്നതിനേക്കാള്‍, കാതിനുള്ളില്‍ എത്തിയവയ്ക്ക് എന്തൊക്കെ രൂപമാറ്റം സംഭവിക്കുന്നു എന്നതാണ് കേള്‍വിക്കാരന്റെ സ്വഭാവസവിശേഷത വ്യക്തമാക്കുന്നത്. ഒരാളുടെ സംസാരവിഷയം എന്തൊക്കെയാണെന്ന് അറിഞ്ഞാല്‍ അയാളുടെ ബൗദ്ധിക നിലവാരവും മാനസിക നിലയും പിടികിട്ടും. കേട്ടത് ശരിയായാലും തെറ്റായാലും അത് പ്രചരിപ്പിക്കുമ്പോള്‍ ആരോപണവിധേയരാകുന്നവരുടെ മാനസിക നിലയെപറ്റി നാം ഓര്‍ത്താല്‍ നല്ലത്. ബലിയാടാകുന്നവരോട് സംസാരിച്ചാല്‍ കേട്ടകാര്യങ്ങളുടെ മറുവശം കൂടി നമുക്ക് കേള്‍ക്കാനാകും… നല്ലതിനെ മാത്രം അരിച്ചെടുക്കുന്ന അദൃശ്യമായ ഒരു അരിപ്പ നമുക്ക് ചെവിയില്‍ സൂക്ഷിക്കാനാകട്ടെ – ശുഭദിനം.